الأحد، 22 فبراير 2009

مغامرات فهووود :)


I love you 

you love me

هالكلمات لها اثر كبييير على قلبي لما اسمعهم من ولدي
اول ما تعلم يقولها كان يغنيها عادي (من كثر ما يطالع بارني )
بس الحين كبر و فهم شنو يعني i love you
لما يقولها و يلمني يحسسني بشعوووور حده اينن
احس يقوووولي من كل قلبه احبببببج

-----

امس كنت اكلم اختي الصغيره 
دزتلي صورهم لما كانوا مسافرين

طبعا انا كل صوره اشوفها عيوني تغووووورق

اللي احس ابيييييهم 
صج ولهانه عليييهم

عاد ناديت فهودي
عشان يشوف الصور

اول شي تنح

يطاااالع و اهوه من صجه منددمممج حدددده

بعدين علق على اسم اباااااااا

ابااااا

اباااااا

طبعا ابااا اهوه اخوي عبدالله

و ظل طول اليوم يناديه 

 ;)

----
امس رحنا السينما

اول مره اروح سينما بأمريكا
الفلم كوميدي
(يعني رايحه اوسع صدري و اضحك )

فهوووود كانت هذه اول روحة سينما بحياته

الفلم بدا ١٠ بالليل

طبعا فهد مع الناس عالخط

بس احد يضحك
اهو يبطها ضحكم معااااهم اللي يشوفه يقول فاهم يعني شسالفه 

هههههههه

و حبيبي عاجبه البوب كورن 

كانت رحله موفقه 
استانست الصراحه 

و اهم شي جربنا نودي فهود السينما

عشان نروح كل ما ضاق خلقنا :)





الأربعاء، 18 فبراير 2009

حياة جديدة :)

ها أنا آعود من جديد 

بعد فترة طويلة

قضيتها في الكويت

تلك الفترة كانت بمثابة مرحله جميله انقضت 

و صفحه براقه انطوت

 من صفحات حياتي

فقد انتهت ايام الدراسة الجامعيه 

و قبل يومين بشرتني امي بأن أبي استلم شهادتي الجامعيه

لم ارها لكنني احمل مشاعرا دفاقه لكي اراها

ها انا في "امريكا " مجددا منذ  اكثر من اسبوعين و انا هنا

ولاية جديدة

منطقه جديده

و بإذن الله ستكون المحطة الاخيره 

رجعت لاكتب في هذا المكان الذي احببته

الذي اشعر بأنه يحتويني 

على الرغم من انني كنت اتابع بعض المدونات دون تعليقات و ردود الا اننا اشتقت لكم :) 


--

هنا اكتب شيئا من حياتي الجديدة

بعد تخرجي

و في غربتي 

:)


السبت، 27 سبتمبر 2008

خبر حلو ;)

ها قد شارف على الانتهاء
ايام قليلة و ستطوى صفاحته
فقد مر بسرعة خيالة
كالبرق !
بل كلمح البصر
شهر رمضان
هذه السنة مختلف تماما
لم اشعر بحلاوته بين أهلي و أحبابي
افتقدت الكثير... لكن
له مذاق خاص
فقد قضيته بين زوجي و ابني
:)
أسأل الله أن يتقبل منا و منكم صالح أعمالنا
----
خبر !
ان شاءالله بعد العيد برجع الكويت
باقيلي اخر كورس بالجامعه و اتخرج
ادعولي :)
انا و فهد رادين ان شاءالله بعد العيد
الله يسهل دربنا و نوصل الكويت بالسلامة
دعواتكم
:)

الخميس، 11 سبتمبر 2008

ادمااااان ::spicy sweet chili ::

هذا ادماااااااااااان
خلوني اقولكم قصته
قبل رمضان كنا مسافرين منطقه ثانية عشان نتسوق :)
بالطريج وقفنا نترس بانزين
عاد كنا يواعى بوفهد نزل يشتري شي ناكله
و من ضمن الاغراض ياب هالبطاط
قالي ذوقيه
حده عجيب
راح يعجبج
انا كل يوم اذا عندي بريك بالدوام اكله
ذقته
و من اول نظرة
اقصد قرمه
حبيته
صج صج لذيذ
و تدرون شنو كاتبين عليه ؟
when spicy meets sweet
وااااو طعمه سبايسي على سويت
صج حلوو و غريب
عاذ الحين صايره بعد الفطور كله
طبعا عالفطور افطر على تمره و اشرب شويه شوربه و خلااااص اشبع
عقب ساعتين اكل هالبطاط
صج صج صج ادماااااااااان
جان زين اعرف اذا في منه بالكويت و الا لأ
عشان اذا ما في منه اضمن مستقبلي و اييب معاي
ههههههههه

الاثنين، 8 سبتمبر 2008

خبر وفاة !

مثل كل يوم
اقعد الصبح مع قعدة فهود اغسل و ابدل
و البس فهود و انزل تحت
على طول اشبك و ادخل على " سكايب" عشان اكلم اهلي
استانس لما اكلمهم
افتح الكاميرا و يشوفون فهودي و يلعبونه
.
.
.
:)
اليوم امي قالتلي خبر ضيق خلقي
حرك مشاعري
خلى الدموع تنزل من عيني
قالتلي بنبرة حزينة
تعرفين فلانه ؟
قتلها اي
قالتلي توفت اليوم الله يرحمها
(نعرفها و تصير حق بنات خالاتي )
قلت : لا حول و لا قوة الا بالله الله يرحمها
شلون توفت ؟؟
قالتلي امي : ما اتصدقين
كانت قاعده مع بنتها تسولف و تتغشمر
بنتها تقولها يمااا تدرين اني راح اموت قبلج ؟؟
الام : لاااا انا راح اموت قبلج ؟؟
و يتهاوشون على ضحك ؟؟
انا بموت قبل و البنت تقول لاا انا
فجأة !!!
الأم طاحت
و ابتسمت ابتسامة بريئة و قالت حق بنتها
شفتي مو قتلج اني راح اموت قبلج ؟
و الله سبحانه خذا امانته
البنت ما صدقت
تضحك تقول حق امها يمااا قومي شهالحركات اللي تسوينها يالله قومي !!
راحت صوبها
لقتها صج توفت
ربي خذى امانته
موقف صج غريب و اثر فيني
سبحان الله
شلون توفت ؟؟
الله يصبر قلب بنتها و كل اهلها يا رب
الله يرحمها و يسكنها فسيح جناته
اللي ريحني انها توفت و اهي صايمه قبل لا يأذن
و كلنا ندري ان الانسان يحشر على حاله اللي كان عليه لما توفى
و ان شاءالله ربي يحشرها يوم القيامه و اهي صايمة
و توفت يوم الاثنين
هاليوم اللي ترفع فيه الاعمال
و فوق كل هذا و هذا
توفت برمضان
عسى ربي يتقبل اعمالها و يرزقها الجنة يااارب
عقب ما قالتلي امي هالشي
سألت نفسي سؤال واحد !!
انا شلون راح اموت ؟؟
و وين ؟؟
و شنو اخر عمل بيكون لي؟؟
الله يرزقنا حسن الخاتمه
نصيحة من القلب :
دامنا برمضان خل نرجع حق ربنا
نقرى قرآن بس مو مثل ما نقراه كل مره
نقرى كل كلمة و نستشعر فيها
نصلي بس صلاتنا هالمرة غير صلاة صج تقربنا من ربنا
ليش ما نتوب و نستغفر على كل ذنب سويناه بحياتنا
.
.
.
عسى الله يتقبل أعمالكم الصالحة يارب =")

الخميس، 28 أغسطس 2008

اشرق قلبها من جديد

أمس في العاشرة مساءً و بالتحديد كنا في ""وول مارت "" (جمعية)

و بعد انتهاءنا من التسوق

جاءتني فتاة أمريكية يبدو عليها انها بالعشرينيات و معها صديقتها

أتتني باستحياء شديد

و بنبرة خجلة قالت : منذ البارحه و أنا أبحث عن حجاب لأشتريه ؟ هل تعلمين أين أجده ؟


بدى على وجهي الاستغراب فلم اتوقع سؤالها


خصوصا أن كل من يسألني عن الحجاب كان مجرد أن يبدى رأيه بأنه جميل


لكنها كانت تبحث عنه ؟


تريده ؟؟

يا ترى لماذا ؟؟

تلك التساؤلات السريعه التي انطبعت في ذهني

و بسرعه أجبتها على سؤالها و قلت :

ان الحجاب الذي ارتديه اشتريته من بلدي ؟

بدت ملامح الحزن على وجهها و قالت :

حتى مواقع التسوق في الانترنت بحثت بها لكن دون جدوى !!

فعلا أحتاجه فأنه أبحث عنه لأني أريده !!

تلك الجملة التي هزتني

تريده !! و تبحث عنه ؟

يا ترى لماذا ؟؟

قلت لها : هل لك أن تأتي معنا إلى بيتنا !
عندي الكثير و سأعطيك الحجاب هديه !

قالت لي بفرح شديد

و بإبتسامه ملأت وجهها

و لا مانع لدي أن أشتريه منك !!

زاد استغرابي بتعلقها بالحجاب !
فابتسمت لها ابتسامه أمل و قلت لها : اتبعينا بسيارتك إلى منزلنا

و فعلا تبعتنا بسيارتها هي و صديقتها
إلى ان وصلنا المنزل

نزلت من السياره بسرعه خياليه و توجهت إليها فقلت لها :

انتظريني دقيقه لأحضره

ذهبت الى المنزل
و كنت اشعر بأن خطواتي تسبقني

فتحت خزانتي و اخرجت منهما ( لفتين ) جديدتين لم البسهما

و عدت إليها بسرعه

فأعطيتها و قلت لها : واحد لك و الاخر لصديقتك
هدية مني لك اتمنى ان تعجبك

فقالت و الدموع تملأ مقلتيها : صدقيني أنها أجمل هدية في حياتي

قلت لها بخجل : هل تسمحين لي بأن أسألك سؤال ؟

قالت : بكل سرور تفضي

قلت : لماذا كل هذا الاصرار على الحجاب؟ لماذا تريدينه ؟

أجابتني بحزن شديد قد ملأ تقاسيم وجهها البرئ

يوم أمس كنت في مؤتمر , هذا المؤتمر غير حياتي , جعلني أشعر بأنني كنت في ظلال عظيم

أمورا كثيرا يجب علي ان اغيرها في نفسي و في حياتي
ايقنت انني ملزمة بارتداء الحجاب

أحببته
و اريده
اريد ارتداءه
لن تعلمي مدى الحزن الذي يملأ قلبي و وجداني
اشعر انني كنت ضائعة بين أمور أنستني نفسي و أنستني السعادة الحقيقية

ثم بكت بكاء قطع فؤادي و جعل الدموع تتساقط من عيني بكل حراره

في هذا الموقف كنت أريد فقط ان اضمها نحوي

ان اقول لها انك الان في الطريق الصحيح

ان الله يحبك لانه دلك الطريق الصحيح

مسحت دمعاتي المتساقطه و قلت لها لا تبكين عزيزتي

فسألتها : هل تعرفين كيفية ارتداءه ؟

قالت لي لااا

فأخذت واحدا فألبستها اياه

حينما رأيتها بالحجاب قلت لها بعفويه : أنت الآن أجمل بالفعل اجمل

ابتسمت ابتسامه خرجت من قلبها الطاهر

و قالت لي : شكرا لك لا اعرف كيف اشكرك

علمتها و صديقتها كيفية ارتداءه

فقلت لها نحن الان صديقات و ان كانت هذه المرة الاولى التي نلتقي فيها

فتبادلنا الايميلات

و اتفقنا على ان نتواصل بالمسنجر
.
.

ودعتها على أمل لقاء اخر

لا اعلم ان كنا سنلتقى ام لا

لكنني أعلم ان الله سبحانه و تعالى أراد لها الخير

أراد لها الحياة

بل الحياة الحقيقية في ظل السعادة الربانية
سبحانه .. يهدي من يشاء إلى صراط مستقيم

هذا الموقف
جعلني في سعادة غامرة لا تصفها حروفا و لا كلمات

:")

الأربعاء، 20 أغسطس 2008

part 3 -NSSSAU-bahamas

البارت الثالث :)

NASSAU


هالجزيرة كبيييره حيل و في ناس ساكنينها


و فيها فنادق و منتجعات سياحية


و فيها فندق يعتبر من أفخم فنادق العالم


اسمه

atlantis

وااااايد حلووو كبييير و من داخل خياااال

فيه اكواريوم

حده عجيب
و طبعا يصير تدخلون الاكواريوم حتى لو ما كنتوا من سكان الفندق بس طبعا بفلوس
و بالليل لا تشوفون الجو العجيب
يسكرون الاكواريوم و يحطون الطاولات و الكراسي و يصير مطعم
طبعا المنظر خيااال
تتعشون و انتا اتشوفون السمج
و حتى السمج شكاه حلو وغرييييب :)

ان شالله الحين بحطلكم الصور


طبعا وصلنا الصبح الساعه 8 :)

نزلنا من الكروز


و اول شي خذينا رحله مدتها ساعتين نفتر بكل الجزيرة و نشوف الاماكن السياحية اللي فيها


طبعا الوضع كان روعة


صج هالجزيرة حلوة قعدنا فيها لي الساعه 12 بالليل و هم ما شبعنا


فيها سوق ماركاته وايد حلوه

و المطاعم اغلبها موجوده بالجزيرة

غير البحر اللي يشوق


اخليكم مع الصور






هذا مدخل الجزيره :)




صور الفندق :) اللي فوق


كنا برا الفندق


و الصورة اللي تحت داخل الفندق :)



و هذي صورة ثانية :)


الفندق من برا






و هذا مدخل الفندق :)



هالصور من الاكواريوم :)



مادري شلون جكيتها ههههه :)


و هذا البحر :)


حدددا البحر حلووو و يشوق :)



و هذه الصوره (مو من تصويري) الفندق من بعييييد :)


اينن حده


كانت الرحله جدا ممتعه :) استانسنا بالبحر و بالجزيره كلها صج رووووعه و اللي يبي يروحلها نصيحه يقعد بالفندق لانه عجييييب


احنا ما قدرنا نقعد فيه لان حجزنا مع كروز :)


هذا كان اليوم الثالث :)


و اليوم الرابع كان بوسط البحر بالكروز ما رحنا مكان و اليوم الخامس رجعنا فلوريدا :)



اتمنى انكم استمتعتوا بالصور و التقرير البسيط للسفرة :)